ހދ. މަކުނުދޫގައި، ވެލްޑިންކުރަން ގެންގުޅޭ ގޭސްފުޅިއެއް ގޮވައި މަރުވި ދެ މީހުންގެ ހަށިގަނޑު އިންޑިއާއަށް ފޮނުވާލާފައިވާ ކަމަށް ފުލުހުން މިއަދު ބުނެފިއެވެ. 

މިދިޔަ ހޮނިހިރު ދުވަހު ހިނގި ހާދިސާގައި މަރުވީ އިންޑިއާގެ 2 މީހުންނެވެ. އެއީ އުމުރުން 25 އަހަރުގެ މީހަކާއި 27 އަހަރުގެ މީހެކެވެ.  

އެ ދެ މީހުންގެ ވެސް ހަށިގަނޑު ވަނީ ވަރަށް ބޮޑަށް ޒަހަމްވެފައެވެ. ގޭސްފުޅި ގޮވިލެއް ބާރު ގަދަކަމުން އެ ދެ މީހުންގެ ހަށިގަނޑުގެ ބައިތައް ވަރަށް ދުރަށް ބުރައިގެން ގޮސްފައި ހުރިކަމަށް މަންޒަރުދުއް މީހުން ބުނެއެވެ. 

ފުލުހުން ބުނީ ބަލަން ޖެހޭ ކަންކަން ހުރުމުން ހަށިގަނޑުގެ ބައިތައް އާދީއްތަ ދުވަހު މާލެ ގެނައުމަށް ފަހު އާއިލާއާ ހަވާލުކުރަން އިންޑިއާ އަށް ފޮނުވާލީ އިއްޔެ ކަމަށެވެ.

މަރުވި ދެ މީހުންނަކީ މަކުނުދޫ އެއާޕޯޓު އަޅަން ބޭނުންވާ ބިން ހިއްކުމާއި ގޮނޑުދޮށް ހިމާޔަތް ކުރުމުގެ މަޝްރޫއުގެ މަސައްކަތްކުރާ ބިގް ފިޝް ކުންފުނީގެ ދެ މީހުންނެވެ.

ގޭސްފުޅި ގޮވުމުގެ ހާދިސާ ހިނގަން މެދުވެރިވި ގޮތް ސިފައިންނާއި ފުލުހުން އަންނަނީ ތަހުގީގުކުރަމުންނެވެ.