ސިވިލް ސާރވިސް މުވައްޒަފުން ރަސްމީ ބަންދު ދުވަހު މަސައްކަތްކުރާނަމަ، ޙާޒިރީ އެލަވެންސް ލިބޭގޮތަށް ދައުލަތުގެ ޕޭ ފްރޭމްވޯކް އިޞްލާޙުކޮށްފިއެވެ. ފިނޭންސް މިނިސްޓްރީން ޢާންމުކުރި ދައުލަތުގެ ޕޭ ފްރޭމްވަރކްގެ މިންގަނޑުތަކު އިޞްލާހުގައިވަނީ ޙާޒިރީ ޢިނާޔަތަކީ ރަސްމީ މަސައްކަތު ދުވަސްތަކުގެ ތެރެއިން މުވައްޒަފު އޮފީހަށް ހާޒިރުވާ ކޮންމެ ދުވަހަކަށާއި ރަސްމީ ބަންދު ދުވަސްތަކުގައި ޑިއުޓީ އުސޫލުން އޮފީހަށް ހާޒިރުވެ، މަސައްކަތްކުރާކޮންމެ ދުވަހަކަށް ދޭ ޢިނާޔަތެއްކަމަށެވެ. 
މި އުސޫލުގައިވާ ގޮތުން އޮފީހަށް ހާޒިރުވުން ކަމުގައި މާނަކުރާނީ މަސައްކަތު ދުވަސްތަކުގެ ތެރެއިން މުވައްޒަފު ފިޒިކަލީ އޮފީހަށް ހާޒިރުވުމާއި، މަސައްކަތު ދުވަސްތަކުގެ ތެރެއިން އޮންލައިންކޮށް މަސައްކަތް ކުރަންޖެހޭ ހާލަތްތަކުގައި އެ އިދާރާއެއްގައި ހަމަޖެހިފައިވާ އުސޫލުން ސައިން-އިން ވެގެން ހާޒިރުވުމާއި، މަސައްކަތު ދުވަސްތަކުގެ ތެރޭގައި ރާއްޖޭގައި ނުވަތަ ރާއްޖެއިން ބޭރަށް ކުރަންޖެހޭ ރަސްމީ ދަތުރުތަކުގެ ދުވަސްތަކަށްކަމަށް ޕޭ ފްރޭމްވޯކަށް ގެނައި އިޞްލާހުގައިވެއެވެ.

ވަޒީފާއާބެހޭ ޤާނޫނުގައި ބަޔާންކޮށްފައިވާ ރަސްމީ ބަންދު ދުވަސްތަކާއި، ހުކުރު ދުވަސްތަކުގައި މުވައްޒަފު އިދާރާއަށް ހާޒިރުވެ ޑިއުޓީ އުސޫލުން އިދާރާގެ ރަސްމީ މަސައްކަތު ގަޑީގެ ގޮތުގައި ކަނޑައަޅައިފައިވާ ޖުމުލަ ވަގުތުގެ މަދުވެގެން ދެބައިކުޅައެއްބައި ވަގުތު މަސައްކަތްކުރާ ހާލަތްތަކުގައ،ި ޙާޒިރީ ޢިނާޔަތް ލިބޭނެކަމަށް އިޞްލާހުގައިވެއެވެ. އަދި އޮފީހުގެ ފަރާތުން ރަށްރަށަށާއި ރާއްޖެއިން ބޭރަށް ކުރަން ޖެހޭ ރަސްމީ ދަތުރުތަކުގެ ދުވަސްތަކަށް ވެސް ހާޒިރީ އެލަވަންސް ލިބޭނެކަމަށްވެސް އިޞްލާހުގައިވެއެވެ.

ޙާޒިރީ އެލަވެންސް ދިނުމުގައި އިސްތިސްނާވާނެ ޙާލަތްވެސް މި އިޞްލާހުގައި ބަޔާންކުރެއެވެ. އެގޮތުން އެއްވެސް މުވައްޒަފަކު ދައުލަތުގެ ޕޭ ފްރޭމްވަރކަށް ހިޖުރަކުރާ ތާރީޚުން ފެށިގެން ގިނަވެގެން 21 މަސްދުވަހުގެ ތެރޭގައި ވަޒީފާއިން ވަކިވެގެންދާއިރު ޢިނާޔަތް ދޭންޖެހޭނަމަ އެ މުވައްޒަފަކަށް ލިބޭނެ ޢިނާޔަތް އިޚުތިޔާރުކުރުމުގެ ފުރުޞަތު އޮންނާނެކަމަށް އިޞްލާހުގައިވެއެވެ.