ށ.ފޯކައިދޫ ޞިއްޙީމަރުކަޒާއި، ގއ އަތޮޅު ހޮސްޕިޓަލްގެ މަސައްކަތްތައް ދެކުންފުންޏަކާއި ހަވާލުކޮށްފިއެވެ.

މިނިސްޓްރީ އޮފް ހެލްތުން ވިދާޅުވީ، ށ.ފޯކައިދޫ ޞިއްޙީ މަރުކަޒުގެ ވަށާފާރު ރޭނުމާއި، ޞިއްޙީ މަރުކަޒުގައި ކުރަން ހުރި ބައެއް މަސައްކަތްތައް ކުރުމަށް ހަވާލުކޮށްފައި ވަނީ، ހާފް ކޮންސްޓްރަކްޝަން އިންވެސްޓްމަންޓާއި ކަމަށެވެ. އެކުންފުންޏާއި މިމަސައްކަތް ހަވާލުކޮށްފައި ވަނީ، 791,150.41ރުފިޔާ (ހަތްލައްކަ ނުވަދިހަ އެއްހާސް އެއްސަތޭކަ ފަންސާސް ރުފިޔާ ސާޅީސް އެއްލާރި)އަށް 90 ދުވަހުގެ ތެރޭގައި މަސައްކަތް ނިންމާ ގޮތަށެވެ.

މިއެއްބަސްވުމުގައި، މިނިސްޓްރީ އޮފް ހެލްތުގެ ފަރާތުން ސޮއެކުރައްވާފައި ވަނީ، ސީނިއަރ އެގްޒެކެޓިވް ޑައިރެކްޓަރ ޢަބްދުލް ޙަންނާނު ޙުސައިނެވެ. އަދި މީހާފް ކޮންސްޓްރަކްޝަން އިންވެސްޓްމަންޓް ފަރާތުން ސޮއިކުރެއްވީ އެކުންފުނީގެ ވެރިޔާ، މުޙައްމަދު ފަހީމްއެވެ.

މިއަދު ސޮއެކުރި މަޝްރޫޢުތަކުގެ ތެރެއިން، ގއ. ހޮސްޕިޓަލުގެ އައު އޯޕީޑީ ހެދުމުގެ މަސައްކަތްތައް ކުރުމަށް ހަަވާލުކޮށްފައި ވަނީ، ސަމާލު ކޮންސްޓްރަކްޝަންއާ އެވެ. އެކުންފުންޏާއި މިމަސައްކަތް ހަވާލުކޮށްފައި ވަނީ، 4.4 މިލިޔަން ރުފިޔާއަށް 120 ދުވަހުގެ ތެރޭގައި މަސައްކަތް ނިންމާގޮތަށެވެ. މިއެއްބަސްވުމުގައިވެސް، މިނިސްޓްރީ އޮފް ހެލްތުގެ ފަރާތުން ސޮއެކުރައްވާފައި ވަނީ، ސީނިއަރ އެގްޒެކެޓިވް ޑައިރެކްޓަރ ޢަބްދުލް ޙަންނާނު ޙުސައިނެވެ. މީހާފް ކޮންސްޓްރަކްޝަން އިންވެސްޓްމަންޓް ފަރާތުން ސޮއެކުރެއްވީ އެކުންފުނީގެ މެނޭޖިންގ ޑައިރެކްޓަރ ބުޝްރީ މުހައްމަދެވެ.