މިހާރު ކުރިއަށްދާ ޕްރެޒިޑެންޓްސް ކަޕް 2023 ގެ ދެވަނަ މެޗުގައި ކްލަބް ވެލެންސިއާ އަދި ސުޕަރ ޔުނައިޓެޑް ސްޕޯޓްސް (ސަސް) ބައްދަލުކުރި މެޗުގައި ކުޅެ, ކްލަބް ވެލެންސިއާގެ އިލާން އިމްރާން ރާއްޖޭގެ ފުޓުބޯޅައިގެ ތާރީހީ ފޮތުން ވަރަށް ޙާއްސަ ޖާގައެއް ހޯދައިފިއެވެ. 

ހުކުރު ދުވަހުގެ ރޭ ކުޅުނު މި މެޗު ބޮޑު ތަފާތަކުން ސަސް އިން ކާމިޔާބުކުރި ނަމަވެސް, މި މެޗުގައި ކުޅެ އިލާން މި ވަނީ ދިވެހި ރާއްޖޭގެ ފުޓުބޯޅައިގެ ތާރީހުގައި ޕްރޮފެޝަނަލް ލެވެލްގައި ކުޅުނު އެންމެ ހަގު ކުޅުންތެރިޔާގެ މަގާމް ހޯދާފައެވެ. މި މެޗު ކުޅުނު އިރު އިލާންގެ އުމުރަކީ 14 އަހަރާއި 2 މަހާއި 28 ދުވަހެވެ. 

ސީދާ މި ޝަރަފު ނުލިބުނު ކަމުގައިވީނަމަވެސް, ވެލެންސިއާގެ އީތަން ޒަކީ ވެސް މި ވަނީ ސަސްއާ ދެކޮޅަށް ކުޅެ, ޕްރޮފެޝަނަލް ފުޓުބޯޅައިގެ ފުރަތަމަ ފިޔަވަޅު އަޅާފައެވެ. އިލާން އަށް ވުރެއް އީތަން ދޮށިވަނީ މަދު ދުވަސްކޮޅެއްގެ ތަފާތުންނެވެ. މި މެޗު ކުޅުނު އިރު އީތަންގެ އުމުރަކީ 14 އަހަރާއި 5 މަހާއި 8 ދުވަހެވެ. 

Advertisement

މި ދެކުޅުންތެރިންނަކީ ނިމިދިޔަ އިންޓަ ސްކޫލް ފުޓުބޯޅަ މުބާރާތުން ވަރަށް ގިނަ ބައެއްގެ ލޮލުގައި އަޅައިގަނެފައިވާ ވަރަށް ހުނަރުވެރި ދެ ކުޅުންތެރިންނެވެ. 

ބަދަލު ކުޅުންތެރިއެއްގެ ގޮތުގައި ނިކުމެ, ކްލަބް ވެލެންސިއާގެ އަޙްމަދު ކަޔަން ގިޔާސް ވެގެން ގޮސްފައި މިވަނީ, މި ލެވެލްގައި ކުޅުނު 3 ވަނަ އަށް އެންމެ ހަގު ކުޅުންތެރިޔާއަށެވެ. މި މެޗަށް ނިކުތް އިރު އޭނާގެ އުމުރަކީ 14 އަހަރާއި 6 މަހާއި 6 ދުވަހެވެ.

މި މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަމުން ވެލެންސިއާގެ ކޯޗު އަޙުމަދު މުޖުތަބާ (ފެސްކޯ) ފާހަގަ ކޮށްފައިވާ ގޮތުގައި, މިދިޔަ އަހަރުގެ ޗެމްޕިއަނުންގެ ގޮތުގައި މުބާރާތަށް ނިކުތް ނަމަވެސް ޕްރެޒިޓެންޓްސް ކަޕްގެ ތަށި ދިފާއު ކުރެވޭނެ ފެންވަރު އެޓީމުގައި ނެތްކަމަށް ބުނެވިދާނެ ކަމަށާއި, އެހެން ބުނި ނަމަވެސް އެއީ ކާމިޔާބު ބޭނުން ނުވާތީ ބުނާ އެއްޗެއް ނޫންކަމަށް އޭނާ ފާހަގަކުރިއެވެ. މި ކަމުގައި އޮތް އެންމެ ބޮޑު ގޮން ޖެހުމަކީ މުބާރާތަށް ފަރިތަ ކުރަން ލިބުން މުއްދަތު ކުރުވުމުންކަން އޭނާ އިތުރަށް ފާހަގަ ކުރިއެވެ.