އޮފީސްތަކާއި ކުންފުނިތަކުގެ މެދުގައި ބާއްވަމުން އަންނަ ހޭންޑްބޯލް އަންހެން ފުރަތަމަ ޑިވިޝަން މުބާރާތް އަނެއްކާވެސް ކާމިޔާބުކޮށް، މި ތައްޓަކީ އެހެން ޓީމަކަށް އަތްޖައްސާލެވޭނެ ތައްޓެއް ނޫންކަން ކްލަބް އިމިގްރޭޝަނުން ސާބިތުކޮށްދީފިއެވެ.  މިހާތަނަށް ހޭންޑްބޯލް އަންހެން ފުރަތަމަ ޑިވިޝަންގެ 7 މުބާރާތް ބާއްވާފައިވާއިރު، މި ހުރިހާ މުބާރާތެއްގެ ޗެމްޕިއަންކަން ހޯދާފައިމިވަނީ އެ ޓީމުންނެވެ. އެހެންކަމުން މި މުބާރާތުގެ ތާރީހުގައި އިމިގްރޭޝަނުން ކުރަމުންމިދާ ރަސްކަމުގެ ހަނދާންތައް ޒަމާންތަކަކަށް ދެމިގެންދާނެކަން ޔަގީނެވެ. 

މި މުބާރާތުގައި ވާދަކުރި 4 ޓީމު ގްރޫޕް ސްޓޭޖްގައި އެއް ޓީމު އަނެއް ޓީމާ ބައްދަލުކުރިއިރު، އިމިގްރޭޝަނުންވަނީ ހުރިހާ މެޗެއްވެސް ބޮޑު ތަފާތަކުން ކާމިޔާބުކޮށްފައެވެ. އެގޮތުން ފުރަތަމަ މެޗުގައި އެމް.އޭ.ސީ.އެލް. ބަލިކޮށްފައިވަނީ 40-08 އިންނެވެ. ދެވަނަ މެޗުގައި ފިނޭންސް 29-12 އިން އަދި ގްރޫޕް ސްޓޭޖް ފަހު މެޗުގައި އައި.ޖީ.އެމް.އެޗް. ބަލިކޮށްފައިވަނީ 39-14 އިންނެވެ.

ގްރޫޕް ސްޓޭޖުން އެންމެ ގިނަ ޕޮއިންޓު ލިބޭ 2 ޓީމް ފައިނަލަށް ދަތުރުކުރާއިރު، ފައިނަލްގައި އިމިގްރޭޝަނާ ދެކޮޅަށް ނިކުތީ އައި.ޖީ.އެމް.އެޗް. އެވެ. ފަސޭހަކަމާއެކު ފައިނަލް މެޗު އިމިގްރޭޝަނުން ކާމިޔާބުކުރީ 46-12 އިންނެވެ. މި މެޗުގެ ކްއީން އޮފް ދަ މެޗަކަށް ހޮވިފައިވަނީ އިމިގްރޭޝަންގެ ޖާޒީ ނަމްބަރު 51، ނަޝްފާ އާމިރާއެވެ. 

މުބާރާތުގެ އެންމެ މޮޅު 7 ކުޅުންތެރިންގެ ތެރޭގައި ނަޝްފާއާއެކު އިމިގްރޭޝަންގެ 4 ކުޅުންތެރިއަކު ހިމެނެއެވެ.

މުބާރާތުގެ އެންމެ މޮޅު 7 ކުޅުންތެރިން، ފޮޓޯ: އިމިގްރޭޝަން