ގެދޮރުވެރިޔާއާ ބިންވެރިޔާ ސްކީމްގެ ދަށުން ގޯއްޗާއި ފްލެޓަށް އެދި ހުށައެޅުމަށް ހުޅުވާލި ދެވަނަ ފުރުޞަތުގައި 40000 ވުރެ ގިނަ މީހުން ފޯމު ހުށައަޅައިފިއެވެ.

ސަރުކާރުން ހާމަކޮށްފައިވާ ގޮތުގައި، ފްލެޓަށް 21،247 މީހުން އަދި، އަދި ގޯއްޗަށް 19،347 މީހުން ވަނީ ފޯމު ހުށައަޅާފައެވެ. 

ގޯއްޗާއި ފުލެޓް ދިނުމަށް ކަނޑައެޅި ޝަރުޠުތަކުގެ ތެރޭގައި ހިމަނާފައި ވަނީ، ގޯއްޗަށް އެދޭ ފަރާތަކީ މާލޭގެ ރައްވެއްސެއް ކަމުގައިވުމާއި، މާލޭގައި ދިރިއުޅޭތާ 20 އަހަރުވެފައި ވުމާއި، ފްލެޓަށް އެދޭ ފަރާތަކީ، މާލޭގައި ދިރިއުޅޭތާ 15 އަހަރުވެފައިވާ ފަރާތަކަށްވުމެވެ.

ބިންވެރިޔާ ސްކީމްގެ ފުރަތަމަ ބުރުގެ ދަށުން ގޯތި ލިބުނު ފަރާތްތަކުގެ ތެރެއިން ގިނަ ބަޔަކަށް މިހާރު ވަނީ ބިން ކަނޑައި ގޯތިވެސް ހަވާލުކޮށްފައެވެ. އަދި ފްލެޓް ލިބޭ ފަރާތްތަކަށް ފްލެޓް ހަވާލުކޮށްފައި ނުވި ނަމަވެސް، އިންޑިއާގެ ދެކުންފުންޏަކާއި ހަވާލުކޮށްގެން ހުޅުމާލޭގައި އަޅާ، 4000 ފްލެޓްގެ މަސައްކަތް ވަރަށް ބާރަށް ކުރިއަށް އެބަދެއެވެ. މިގޮތުން ފުރަތަމަ އަޅާ 32 ޓަވަރުގެ ތެރެއިން ބައެއް ޓަވަރުތަކުގައި މިހާރު ކުރަމުން ދަނީ ފިނިޝިންގ މަސަކަތްތަކެވެ.

ގެދޮރުވެރިޔާ ސްކީމްގެ ދަށުން ފްލެޓް ދޫކުރުމަށް އިތުރު 4000 ފްލެޓް އެޅުމުގެ މަސައްކަތްވެސް މިއަހަރުގެ އޮގަސްޓްމަހު ވަނީ އިންޑިއާގެ އެހެން ކުންފުންޏަކާއި ހަވާލުކޮށްފައެވެ.