ފ. މަގޫދޫގައި އެއަރޕޯޓް އަޅަމުންދާ ސަރައްހަދު އެރަށުގެ ކައުންސިލްގެ އިހްތިސާސް ނުވަތަ ބާރުން ވަކިކޮށް އެ ސަރަހައްދަކީ ވަކި އިންޑަސްޓްރިއަލް ރަށެއްގެ ގޮތުގައި ސަރުކާރުން ކަނޑައަޅައިފިއެވެ. އެއަރޕޯޓް މަގޫދޫގެ އިހްތިސާސްއިން ވަކިކޮށްފައިވަނީ ރައީސުލްޖުމްހޫރިއްޔާއަށް ގާނޫނު އަސާސީން މަތިކޮށްފައިވާ ސިޓީ ކައުންސިލްތަކާއި ރަށު ކައުންސިލްތަކުގެ އިހުތިސާސް ކަނޑައެޅުމުގެ މަސްއޫލިއްޔަތުގެ ދަށުންނެވެ.

ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގައި ވާގޮތުގެ މަތިން ފ. މަގޫދޫގެ އިދާރީ އިހުތިސާސްއަށް ބަދަލު ގެނައުމަށްފަހު މިއަދު ވަނީ ރައީސުލްޖުމްހޫރިއްޔާގެ އޮފީހުން އެ ގަރާރު ގެޒެޓުކޮށްފައެވެ.

މަގޫދޫގައި އެއާޕޯޓެއް ތަރައްގީކުރުމަށް ނިންމައި މަސައްކަތް ފެށީ މި ސަރުކާރުގައެވެ. ރާއްޖޭގެ ހުރިހާ ސަރަހައްދުތަކެއްގައި ވެސް އެއާޕޯޓުތައް ހިންގަމުން އަންނަނީ ކުންފުނިތަކާ ހަވާލުކޮށްގެން، އެއާޕޯޓު އޮންނަ ރަށުގެ އިހުތިސާސްއިން ވަކިކޮށްގެންނެވެ.

މަގޫދޫ އެއަރޕޯޓު ހަދަން ބޭނުންވާ 30 ހެކްޓަރުގެ ބިން ހިއްކުމުގެ ޢަމަލީ މަސައްކަތް މިހާރުވަނީ މަގޫދޫގައި ފަށާފައެވެ. މިމަސައްކަތް ކުރަނީ އެމްޓީސީސީންނެވެ. މަގޫދޫ ބިން ހިއްކުމުގެ މަސައްކަތް އެމްޓީސީސީއާ ޙަވާލުކުރައްވާފައިވަނީ 206 މިލިއަނަށްވުރެ ގިނަ ރުފިޔާއަށެވެ. މަގޫދޫގައި ޖުމްލަ 48 ހެކްޓަރުގެ ބިން ހިއްކުމަށްވަނީ ހަމަޖެހިފައެވެ. އޭގެ ތެރޭގައި ހިމެނެނީ އެއަރޕޯޓް ޤާއިމުކުރުމަށްޓަކާ ހިއްކާ 30.8 ހެކްޓަރުގެ ބިމާއި ސިނާޢީ މަސައްކަތްތަކަށާއި އިޖުތިމާޢީ ބޭނުންތަކަށް ހިއްކާ 17 ހެކްޓަރުގެ ބިމެވެ.

މަގޫދޫގެ ޖުމުލަ އާބާދީ އަކީ 934 އެވެ. އެއީ 451 އަންހެނުންނާއި 483 ފިރިހެނުންނެވެ. ރަށުގައި ދިރިއުޅޭ އާބާދީ އަކީ 736 އެެވެ.