ދިވެހިރާއްޖެއިން ޢުމްރާއަށް މީހުން ގެންދިއުމަށް އެދި ހުށަހެޅުމުގެ މުއްދަތު މިމަހުގެ ނިއަލަށް އިތުރުކޮށްފިއެވެ.

ޢުމްރާއަށް މީހުން ގެންދިއުމަށް ޝައުޤުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ހުޅުވާލީ މި މަހުގެ 8 ވަނަ ދުވަހުއެވެ. އޭރުއިސްލާމިކް މިނިސްޓްރީން ޕްރޮޕޯސަލް ހުށަހެޅުމުގެ މުއްދަތު ދެއްވާފައިވަނީ މިއަދުގެ ނިއަލަށެވެ. ނަމަވެސް މިހާރު ވަނީ މިމަހުގެ 31ގެ ނިއަލަށް މުއްދަތު އިތުރުކޮށްފައެވެ.

މުއްދަތު އިތުރުކުރީ ގިނަ ބަޔަކަށް ފުރުސަތު ދިނުމުގެ ގޮތުން ކަމަށް އިސްލާމިކް މިނިސްޓްރީން ވިދާޅުވެއެވެ. އިސްލާމިކް މިނިސްޓްރީން ވިދާޅުވީ މިމަހުގެ ނިޔަލަށް ސަރުކާރު ބަންދު ނޫން ކޮންމެ ދުވަހަކު ހެނދުނު 9 އަކުން މެންދުރުފަހު 1 އަކަށް، ޕްރޮޕޯސަލް ހުށަހެޅޭނެ ކަމަށެވެ.

ޢުމްރާއަށް މީހުން ގެންދިއުމަށް އެދި ހުށަހެޅޭނީ އިސްލާމިކް މިނިސްޓްރީން ކަންޑައަޅާފައިވާ ޢުމްރާއަށް މީހުން ގެންދިއުމާއި ބެހޭ އުޞޫލާއި އެއްގޮތަށް ޝަރުޠު ފުރިހަމަވާ ކުންފުނިތަކަށް އެކަންޏެވެ. އިސްލާމިކް މިނިސްޓްރީން ވިދާޅުވީ ޢުމްރާއަށް މީހުންގެންދިއުމަށް އެދި ހުށަހަޅަންޖެހޭ ޕްރޮޕޯޒަލް، އެ މިނިސްޓްރީގެ ވެބްސައިޓުން ލިބެން ހުންނާނެ ކަމަށެވެ.

ޢުމްރާއަށް މީހުން ގެންދިއުމަށް އިސްލާމިކް މިނިސްޓްރީން ވަނީ 41 ކުންފުންޏަކަށް ހުއްދަ ދީފައެވެ. މި ކުންފުނިތަކުގެ ތެރެއިން މިއަހަރުގެ ނޮވެންބަރާއި ހަމައަށް 12 ކުންފުންޏެއްގެ ހުއްދައިގެ މުއްދަތު ހަމަވާނެ ކަމަށް އެމިނިސްޓްރީންވަނީ ވިދާޅުވެފައެވެ.