މިމަހުގެ 7 ވަނަ ދުވަހު ހަމާސް ޖަމާޢަތުން އިޒްރޭލަށްދިން ކުއްލި ހަމަލާގެ ތެރޭގައި، ހަމާސްއިން އަސީރުންގެ ގޮތުގައި ހައްޔަރުކުރި ދެމީހަކު މިނިވަންކޮށްފިއެވެ.

ހަމާސްއިން ނެރުނު ބަޔާނުގައި ބުނެފައި ވަނީ، މިސްރާއި ޤަޠަރު މެދުވެރިއެއްގެ ގޮތުގައި ކުރެވުނު މަޝްވަރާތަކަށް ފަހުގައި، އަސީރުންގެ ތެރެއިން ދެމީހުން ދޫކޮށްލުމަށް ނިންމީ، އިންސާނީ ސަބަބުތަކަށްޓަކައި، އަދި ހައްދު ފަހަނަ އެޅި އިޒްރޭލުން ހިންގާ ހަނގުރާމައިގެ ކުށްތަކާއި އެކުގައި ކަމަށެވެ. ހަމާސްގެ ބެލުމުގެ ދަށުގައިވާ އަސީރުންގެ ތެރެއިން މިިނިވަންކޮށްފައި ވަނީ، ނޫރިތް ޔިޓްޒަކް ނަމަަކަށް ކިޔާ މީހަކާއި، ޔޯޝުވެދް ނަމަކަށް ކިޔާ މީހެކެވެ. އެމީހުންނަކީ ކޮން ޤައުމެއްގެ ރައްޔިތުންނެއް ކަމެއް އަދި ހާމަކަކޮށްފައެއް ނުވެއެވެ.

އިޒްރޭލުގެ ހަމަލާތަކުގެ ސަބަބުން ހަމާސްއިން އަސީރުންގެ ގޮތުގައި ޣައްޒާގައި ހައްޔަރުކޮށްފައިވާ މީހުންގެ ފުރާނަވެސް ނުރައްކަލަށް ހުށައެޅިފައިވާކަން ހަމާސްއިން ވަނީ އިޒްރޭލަށް ހަނދާންކޮށްދީފައެވެ. މީގެ ކުރިންވެސް ހަމާސްއިން ވަނީ އަސީރުންގެ ގޮތުގައި ހައްޔަރުކުރި މީހުންގެ ތެރެއިން 4 މީހަކު ދޫކޮށްލާފައެވެ. އެހެން ނަމަވެސް އަދިވެސް އަސީރުންގެ ގޮތުގައި ހަމާސްގެ ބެލުމުގެ ދަށުގައި ޣައްޒާގައި 200 ވުރެ ގިނަ މީހުން އެބަތިބިކަމަށް، އިޒްރޭލުން ވަނީ ބުނެފައެވެ.

އިޒްރޭލުން ދެމުންދާ ހަމަލާތަކުގައި ޝަހީދުވި ފަަަލަސްޠީނުގެ ރައްޔިތުންގެ އަދަދު މިހާރު ވަނީ، 4600 އަށް އަރާފައެވެ.