ރައްޔިތުންގެ މަޖިލީހަށް ހުށަހަޅާފައިވާ "އޮކިއުޕޭޝަނަލް ސޭފްޓީ އެންޑް ހެލްތު" އަވަސްކުރުމަށް މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، މަސީއިން ގޮވާލައިފިއެވެ.

މި މަހުގެ ތެރޭގައި ހދ. ކުޅުދުއްފުށި އެއާޕޯޓު އަދި ހދ. މަކުނުދޫގައި ހިނގި ގޭސް ފުޅި ގޮވުމުގެ ހާދިސާއާއި ގުޅިގެން އެމްއެންއޭސީއައި އިން އިއްޔެ ނެރުނު ނޫސްބަޔާނެއްގައި ބުނެފައިވަނީ، މި ދެ ހާދިސާގެ އެއްގޮތްކަން ބޮޑުވުމުގެ ސަބަބުން އެ ބާވަތުގެ މަސައްކަތުގައި ބޭނުންކުރާ ތަކެތީގެ ރައްކާތެރިކަމާއި މެދު ކަންބޮޑުވުން އުފެދޭކަމަށެވެ.

މަސީން ނެރުނު ބަޔާނުގައި ބުނީ ބިދޭސީ ކޮންޓްރެކްޓަރަކު މަސައްކަތް ކުރިއަސް، ދިވެހި ކޮންޓްރެކްޓަރަކު މަސައްކަތް ކުރިއަސް މަސައްކަތް ކުރާ ސައިޓާއި ގެންގުޅޭ ތަކެއްޗާއި އާލާތަކަށް ސަމާލުކަންދޭންޖެހޭނެކަމަށެވެ. ވަކީން ޚާއްސަކޮށް ނުރައްކަތެރި ކެމިކަލްތަކާއި ގޭހާއި މިފަދަ އެހެނިހެން ތަކެތީގެ ރައްކާތެރިކަމާއި ފެެންވަރާއި އެތަކެތި ގެންގުޅޭ ގޮތާއި ރައްކާކޮށްފައި ބަހައްޓާ ގޮތްވެސް ބަލަންޖެހޭނެކަމަށެވެ.

މަސައްކަތްކުރާ މީހުންގެ ރައްކާތެރިކަމާއި ސިއްޙަތުގެ ސަލާމަތަށްޓަަކައި އަޅާފައި ހުންނަ ފިޔަވަޅުތައް ކަމާބެހޭ ފަރާތްތަކުން ކަނޑައަޅާފައި އޮންނަ އުޞޫލަކާ އެއްގޮތަށް ބަލައި، މަސައްކަތްކުރާ މީހުންނާއި ވަށައިގެން ދިރިއުޅޭ މީހުންގެ ސަލާމަތާއި ސިއްޙީ ރައްކާތެރިކަން ކަށަވަރުކުރަން ޖެހޭނެ މަސީން ބުނެއެވެ. އަދި މިކަންކަމަކީ ވަޒީފާއާއިބެހޭ ޤަނޫނާއި އިމަރާތްކުރުމުގެ ޤާނޫނުންވެސް ދަޢުލަތުގެ މައްޗަށް ލާޒިމްކުރާ ކަންކަމަށް މި ބަޔާނުގައި ބުންޏެވެ.  

މި ބަޔާނުގައި ވަނީ މަސައްކަތަށް އެންމެ އެކަށީގެންވާ ސަލާމަތާއި ރައްކާތެރިކަމުގެ ފިޔަވަޅު އަޅައިގެން މަސައްކަތް ކުރުމަށް މަސައްކަތްތެރިންނަށް ގޮވާލައި، މަސައްކަތުގެ ސައިޓްތައް ބަލައި ކަންކަން އިސްލާހުކުރުމުގެ ފިޔަވަޅު އެޅުމަށް ދައުލަތަށް ވެސް ގޮވާލާފައެވެ.

"އޮކިއުޕޭޝަނަލް ސޭޕްޓީ އެންޑް ހެލްތު" ގެ ބިލު ރައްޔިތުންގެ މަޖިލީހަށް ހުށަހެޅީ މިދިޔަ ފެބްރުއަރީ މަހެވެ. އެއީ މަސައްކަތްތެރިންނަށް ލިބެންޖެހޭ އެތައް ހައްގުތަކެއް ކަށަވަރުކޮށްދީ އެމީހުންނަށް އަނިޔާއެއް ލިބިއްޖެ ހާލަތުގައި އަމަލުކުރާނެ ހުރިހާ އުސޫލުތަކާއި އިޖުރާއަތްތަކެއް ހިމެނޭ ބިލެކެވެ.