ނުކުޅެދުންތެރިކަން ހުންނަ ފަރާތްތަކުގެ މަޢުލޫމާތު ދެނެގަތުމަށް، މި ކުންފުނިން ހިންގުމަށް ހަމަޖެހިފައިވާ ޙަރަކާތެއްގެ ޢަމަލީ މަސައްކަތް ކުރުމަށް މީހުން ހޯދުމަށް އާސަންދަ ކުންފުނިން އިޢުލާނުކޮށްފިއެވެ.

އެކުންފުނިން ބުނީ، މިފަދަ ކަންކަމުގައި އުޅުއްވާ ޖަމްޢިއްޔާ ޖަމާޢަތްތަކަށް އުޖޫރަ ލިބޭ ގޮތަށް އެމަސައްކަތުގައި ބައިވެރިވުމަށް ހުޅުވާލާފައިވާކަމަށެވެ. މިގޮތުން މި މަސައްކަތަށް ޝައުގުވެރިވާ ފަރާތްތަކުން 17 މެއި 2023 ވާ ބުދަ ދުވަހުގެ 15:30 ގެ ކުރިން ރެޖިސްޓްރީ ކުރެއްވުން އެދޭކަމުގައިވެސް އެކުންފުނިން ވަނީ ބުނެފައެވެ.

މިހާރުވެސް އާސަންދަ ކުންފުނި މެދުވެރިކޮށް އަދި އެންސްޕާ މެދުވެރިކޮށް ސަރުކާރުން ނުކުޅެދުން ހުންނަ ފަރާތްތަކަށް ގިނަ އިނާޔަތްތަކެއް ފޯރުކޮށްދެއެވެ. ނުކުޅެދުންތެރިކަން ހުންނަ ފަރާތްތަކުގެ ދަފްތަރު ބަލަހައްޓަމުން ދަނީ، އެންސްޕާއިންނެވެ.