ސަރުކާރު ބަދަލުވާ ކޮންމެ ފަހަރަކު ދައުލަތުގެ ހުރިހާ ކުންފުންޏެއްގެ މުވައްޒަފުން ބަދަލުވާން ނުޖެހޭ ކަމަށް ރައްޔިތުންގެ މަޖިލީހުގެ މެޖޯރިޓީ ލީޑަރު، ހިތަދޫ އުތުރު ދާއިރާގެ އެމްޑީޕީ މެމްބަރު މުހައްމަދު އަސްލަމް ވިދާޅުވެއްޖެއެވެ.

ރައްޔިތުންގެ މަޖިލީހުގައި މިއަދު ކުރިއަށް ގެންދާ އެއް ބަހުސަކީ ސަަރުކާރުތަކުން އިންތިހާބުތަކަށް ނުފޫޒުފޯރުވުން ހުއްޓައިލަން ގޮވާލައި ހުށަަހެޅުއްވި ގަރާރެއްގެ ބަހުސެވެ. މިއީ މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ ހުށައެޅުއްވި ގަރާރެކެވެ.

ފެނަކަ ކޯޕަރޭޝަނުން އާންމު ވިޔަފާރިތަކަށް ދައްކަން ޖެހޭ ފައިސާ ދައްކަން ގޮވައިލާ ގަރާރެއް ވެސް މަޖިލީހަށް މިވަގުތު ވަނީ ހުށައަޅާފައެވެ.

އިންތިހާބުތަކަށް ނުފޫޒު ފޯރުވުން ހުއްޓާލަން ގޮވާލާ ގަރާރުގެ ބަހުސްގައި ވެސް މެމްބަރުންގެ ތުހުމަތުތައް އެންމެ ބޮޑަށް އަމާޒުކުރެއްވީ ފެނަކަ ކޯޕަރޭޝަނަށެވެ. އެ ތުހުމަތުތަކަށް ރައްދު ދެއްވަމުން އަސްލަމް ވިދާޅުވީ ސަރުކާރުގެ ކުންފުނިތައް ހަރުދަނާ ކުރަންޖެހޭ ކަމަށެވެ. ކުންފުނިތައް ހަރުދަނާ ކުރެވޭނެ އެއް ގޮތެއް ކަމަކަށް އޭނާ ދެއްކެވީ ސަރުކާރުތަކާއި އެކު ކުންފުނިތައް ބަދަލުވާން ނުޖެހޭ ގޮތަށް ބޭއްވުމެވެ.

"ސަރުކާރުގެ ކުންފުނިތައް ހިންގަން ތިބެން ޖެހޭނީ ހަރުދަނާ، ކުންފުނިތައް ހިންގޭ ވަރުގެ ގާބިލު މީހުން. ކޮންމެ ސަރުކާރަކާ އެއްކޮށް ކޮންމެ ކުންފުންޏެއްގެ މަތި އެއްކޮށް ބަދަލުވާކަށް ނުވެސް ޖެހޭނެ އިނގޭތޯ،" އަސްލަމް ވިދާޅުވިއެވެ.

އެގޮތަށް ބަދަލުވާން ނުޖެހޭނީ ގާބިލުކަމަށް ބަލައިގެން ރަނގަޅު މީހުން ކުންފުނިތަކަށް ލައިގެން ކަމަށް ވެސް އޭނާ ވިދާޅުވިއެެވެ.