އަލްމެއިރާއިން ދެ ގޯލު ކާމިޔާބުކޮށްފައިވަނިކޮށް ފަހަތުން އަރާ ޖިރޯނާއިން ބޮޑު މޮޅެއް އެމީހުންގެ މޮންޓިލިވީ ސްޓޭޑިއަމްގައި ހޯދާ، ސްޕެނިޝް ލީގުގެ ކުރީގައި އޮތް ރިއާލް މެޑްރިޑާ ޕޮއިންޓުގެ ގޮތުން ހަމަކޮށްފިއެވެ. ދެ ޓީމުން ވެސް 10 މެޗުން 25 ޕޮއިންޓް ހޯދާފައިވާއިރު، މެޑްރިޑް ކުރީގައި އޮތީ ގޯލު ތަފާތުންނެވެ.

ހޮނިހިރު ދުވަހު ސެވިއްޔާ އާއި ދެކޮޅަށް މެޑްރިޑް ކުޅުނު މެޗު 1-1 އެއްވަރުވުމުން، އެ ނަތީޖާގެ ފައިދާ ޖިނޯރާއިން މިވަނީ ވަރަށް ރަގަޅަށް ނަގާފައެވެ. 

ލީގުގެ ފުލުގައި އޮތް އަލްމެއިރާއިން މެޗުގެ 2 ވަނަ މިނެޓުގައި ފުރަތަމަ ގޯލު ޖަހާ، 24 ވަނަ މިނެޓުގައި ލީޑު ފުޅާކުރިއެވެ. ނަމަވެސް ފުރަތަމަ ހާފު ނިމުމުގެ ކުރިން ޖިރޯނާއިން މެޗުގެ ނަތީޖާ އަނބުރާލިއެވެ. އެގޮތުން ފުރަތަމަ ހާފު ނިމެން ގާތްވެފައި ވަނިކޮށް ހަ މިނެޓުގެ ތެރޭގައި 3 ލަނޑު ކާމިޔާބުކޮށް، 10 މެޗުން 8 ވަނަ މޮޅު ހޯދުމަށް ޖިރޯނާއިން އަމާޒު ހިފިއެވެ. 

މެޗުގެ 37 ވަނަ މިނެޓުގައި ޖިރޯނާގެ އިވާން މާޓިން އެ ޓީމަށް ފުރަތަމަ ގޯލު ކާމިޔާބުކުރިއިރު، މެޗުގެ އޮއިވަރު އަނބުރާލީ 39 ވަނަ މިނެޓާއި 43 ވަނަ މިނެޓުގައި ޑޮވްބީކް ކާމިޔާބުކުރި 2 ގެލޯންނެވެ. އެ ޓީމުގެ 4 ވަނަ ގޯލާއި 5 ވަނަ ގޯލު ކާމިޔާބު ކުރީ މެޗުގެ ފަހުކޮޅުގައި ސެވިއޯ އަދި ސްޓްއާނީއެވެ.

މި ސީޒަނުގައި މޮޅު ނަތީޖާތަކެއް ނެރެމުން އަންނަ ޖިރޯނާ މިހާތަނަށް ބަލިވެފައިވަނީ ހަމައެކަނި މެޑްރިޑު އަތުންނެވެ. އެ މެޗު މެޑްރިޑް ކާމިޔާބުކުރީ 3-0 އިންނެވެ.