ވިނަރެސް ފްލެޓްތަކުގެ އިންޓަރެސްޓް %9އިން %6އަށް ކުޑަކޮށްފިކަމުގައި އާބަންކޯއިން ބުނެފިއެވެ.

މިކަމާއި ގުޅޭ ގޮތިން އާބަންކޯ އިން ނެރެފައިވާ ބަޔާނުގައި ބުނެފައި ވަނީ، ދިގު މުއްދަތަކަށް ފައިސާ ދައްކައި ޚަލާސްކުރާ ގޮތަށް ދޫކޮށްފައިވާ ވިނަރެސް ފްލެޓްތަކަށް ނަގާ ކުލީގެ އިންޓަރެސްޓް ރޭޓް ކުޑަކުރުމަށް ނިންމާފައި ވަނީ ފްލެޓްތައް ގަނެފައިވާ ފަރާތްތަކަށް ލުޔެއް ދިނުމުގެ ގޮތުން ކަމަށެވެ. މިގޮތުން 25 އަހަރަށް ބަހާލައިގެން ފައިސާ ދައްކާ ޚަލާސްކޮށްފައިވާ މި ފްލެޓްތަކުގެ އިންޓަރެސްޓް ރޭޓް ކުޑަކުރުމުން، ފުލެޓަށް ދައްކަންޖެހޭ ޖުމުލަ ފައިސާގެ އަަދަދުން މިލިޔަނެއްހައި ރުފިިޔާ އުނިވެގެންދެއެވެ.

އާބަަންކޯއިން ވިނަރެސް ފްލެޓްތައް ވިއްކާފައި ވަނީ، 2.5 މިލިޔަނާއި، 3.5 މިލިޔަނާއި ދެމެދުގެ އަގުތަކެއްގައެވެ. އަދި ފްލެޓްތައް ގަތް ބައެއް ފަރާތްތަކުން މިހާރު ވަނީ ވިނަރެސް ފްލެޓްތަކުގައި ދިރިއުޅެންވެސް ފަށާފައެވެ.

ވިނަރެސް މަޝްރޫއުގެ ދަށުން، 1344 ފްލެޓް އަޅާފައިވާއިރު، އެއީ 10 ބުރީގެ 13 ޓަވަރެވެ.