1966 ވަނަ އަހަރު އިންގްލެންޑުން ވޯލްޑް ކަޕް ކާމިޔާބުކުރުމުގައި މުހިއްމު ދައުރެއް އަދާކުރި، އަދި މެންޗެސްޓާ ޔުނައިޓެޑްގެ ލެޖެންޑް ސާރ ބޮބީ ޗާލްޓަން އުމުރުން 86 އަހަރުގައި މަރުވެއްޖެއެވެ. އޭނާގެ އާއިލާއިން ހާމަކޮށްފައިވާ ގޮތުގައި އޭނާ މަރުވީ ހޮނިހިރު ދުވަހުގެ ހެނދުނުއެވެ. 

އިންގްލެންޑް ގައުމީ ޓީމާއެކު ޗާލްޓަން ޖުމްލަ 106 މެޗު ކުޅެފައިވާއިރު، ގައުމީ ޓީމަށް އޭނާ ވަނީ 49 ގޯލް ކާމިޔާބުކޮށްދީފައެވެ. އެއީ އޭރު އިނގިރޭސީންގެ ރެކޯޑު އަދަދެކެވެ. އަދި މެންޗެސްޓަރ ޔުނައިޓެޑަށް ކުޅުނު 17 އަހަރުގެ ކެރިއަރުގައި އޭނާ ވަނީ ތިން ލީގު ތައްޓާއި، ޔޫރަޕިއަން ކަޕަކާއި އެފްއޭ ކަޕެއް ހޯދައިފައެވެ. މީގެ އިތުރުން، ކާމިޔާބު ވޯލްޑް ކަޕަކަށްފަހު، އޭނާވަނީ 1966 ވަނަ އަހަރުގެ ބެލަން ޑިއޯ އެވޯޑް ވެސް ހާސިލްކޮށްފައެވެ.

ޗާލްޓަން މަރުވުމާ ގުޅިގެން ޔުނައިޓެޑުން ވަނީ އޭނާ އެ ޓީމަށް ކޮށްދިން ހިދުމަތްތަކުގެ ހަނދާން އާކޮށްފައެވެ. އަދި ޔުނައިޓެޑުން އޭނާ ސިފަކޮށްފައި ވަނީ އެ ކްލަބުގެ ތާރީހުގައި ވެސް އެންމެ މޮޅު އަދި ސަޕޯޓަރުންނާއި މުޅި ޓީމު އެންމެ ލޯބިވި އެއް ކުޅުންތެރިޔާގެ ގޮތުގައެވެ.

ޗާލްޓަންގެ މަރަށްފަހު 1966 ވަނަ އަހަރުގެ ވޯލްޑް ކަޕް ކުޅުނު އިންގްލެންޑް ކުޅުންތެރިންގެ ތެރެއިން މިހާރު ދުނިޔޭގައި ހުރީ، އެ މުބާރާތުގެ ފައިނަލުގައި އިންގްލެންޑުން ވެސްޓް ޖާރމަނީ 4-2 އިން ބަލިކުރި މެޗުގައި ހެޓްރިކް ހެދި ފޯވާޑް ސަރ ޖެފް ހަރސްޓް އެކަންޏެވެ.

ޗާލްޓަންއަކީ 1958 ވަނަ އަހަރުގެ ފެބްރުއަރީ މަހު މެންޗެސްޓަރ ޔުނައިޓެޑުގެ ކުޅުންތެރިން ދަތުރުކުރި މަތިންދާ ބޯޓެއް ވެއްޓުނު ހާދިސާގައި ސަލާމަތްވި ކުޅުންތެރިއެކެވެ. މި އެކްސިޑެންޓެއްގައި 23 މީހުން މަރުވިއިރު، އޭގެ ތެރޭގައި ޔުނައިޓެޑުގެ 8 ކުޅުންތެރިން ހިމެނެއެވެ.