މާލެއަށް ދިމާވެފައިވާ ބޯހިޔާވަހިކަމުގެ މައްސަލައަށް ޙައްލު ހޯދައިދިނުމަށް ސަރުކާރުން އެކަށައަޅައިފައިވާ ސިޔާސަތުގެ ދަށުން، "ގެދޮރުވެރިން"  މި ނަމުގައި ކުރިޔަށްގެންދާ ޕްރޮގްރާމުގެ ތެރެއިން، ދިވެހި ރައްޔިތުންނަށް ފްލެޓު ދޫކުރުމަށް ޓަކައި ހިންގާ "ގެދޮރުވެރިޔާ ސްކީމްގެ ދެވަނަ ފިޔަވަހި" އާއި މާލޭގެ ރައްޔިތުންނަށާއި މާލޭގައި ދިރިއުޅެމުންދާތާ 20 އަހަރަށް ވުރެން ގިނަ ދުވަސްވެފައިވާ ފަރާތްތަކަށް ގޯތި ދޫކުރުމަށްޓަކައި ހިންގާ "ބިންވެރިޔާ ސްކީމްގެ ދެވަނަ ފިޔަވަހި" އަށް އެދި ހުށަހެޅުމުގެ ފުރުސަތު ހަމަވާން ބާކީ 2 ދުވަހަށް ވެއްޖެއެވެ. އެގޮތުން، މި ދެ މަޝްރޫއުގެ ދަށުން ބޯހިޔާވަހިކަން ހޯދުމަށް އެދި ހުށަހެޅުމުގެ ސުންގަޑިއަކީ 24 ސެޕްޓެމްބަރ 2023 ވާ އަންގާރަ ދުވަހެގެ 15:00 އެވެ.

މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ އިން ގޯއްޗަށާއި ފުލެޓަށް އެދި ހުށަހެޅުމުގެ ޝަރުޠު ހަމަވާ ފަރާތްތަކުން "ގެދޮރުވެރިން ޕޯޓަލް" https://gedhoruverin.gov.mv/  މެދުވެރިކޮށް ގޯއްޗަށް ނުވަތަ ފުލެޓަށް އެދި ހުށަހެޅުމަށް ހުޅުވާލީ 2023 ސެޕްޓެންބަރު 24 ގައެވެ. މިނިސްޓްރީއިން ހާމަކޮށްފައިވާ ގޮތުގައި ދެ ސްކީމަށް ޝަރުޠު ހަމަވި ނަމަވެސް ޕޯޓަލް މެދުވެރިކޮށް ފޯމު ހުށަހެޅޭނީ އެ މީހަކު ޚިޔާރުކުރާ ކޮންމެވެސް އެއް ސްކީމަކަށެވެ.

މި ފިޔަވަހީގައި "ބިންވެރިޔާ" ސްކީމްގެ ދަށުން ގޯތި ދިނުމަށް ނިންމާފައިވަނީ ގިރާވަރު ފަޅުންނެވެ. އެގޮތުން ގިރާވަރުފަޅު ހިއްކައި ގޯތި ދޫކުރަން ކަނޑައަޅައިފައިވާ ބިމުގެ ޖުމުލަ ބޮޑުމިނަކީ 5,525,000 އަކަފޫޓެވެ. އަދި ގޯތީގެ އަދަދު ކަނޑައެޅޭނީ، ގޯތި ދިނުމަށް ހޮވޭ ވަކިވަކި އެޕްލިކޭޝަންތަކަށް ދޫކުރާނެ ގޯތީގެ ބޮޑުމިން ކަނޑައެޅުނީމަކަމަށް މިނިސްޓްރީއިން ހާމަކޮށްފައިވެއެވެ.

"ގެދޮރުވެރިޔާ" ސްކީމްގެ ދަށުން ފްލެތް ދޫކުރުމަށް ނިންމާފައިވަނީ މާލޭގެ ރަށްވެއްސަކަށް ވެފައިވާތާ 15 (ފަނަރަ) އަހަރު ވެފައިވާ ފަރާތްތަކާއި (ހަމައެކަނި މައި އެޕްލިކަންޓް) އަދި، މާލޭގައި މެދުނުކެނޑި ދިރިއުޅެމުންގެންދާތާ 15 (ފަނަރަ) އަހަރު ވެފައިވާ ފަރާތްތަކަށެވެ.