ހދ. މަކުނުދޫގައި ދެމީހުން މަރުވި ހާދިސާގައި ގޮވާފައި ވަނީ ގޭސް ސިލިންޑަރެއް ކަމުގައި ފުލުހުން ބުނެފިއެވެ.

ފުލުހުންގެ އިދާރާއިން ބުނީ މިހާތަނަށް ބެލި ބެލުމުން ހާދިސާ ހިނގާފައި ވަނީ އެރަށު މަސްމާރުކޭޓު ސަރަހައްދުގައި އޮތް ގޭސް ސިލިންޑަރެއް ގޮވައިގެންކަން އެނގިފައިވާ ކަމަށެވެ. މަރުވި ދެމީހުންނަކީ، ގޭސް ސިލިންޑަރު ގޮވި ވަގުތުގައި އޭގެ ކައިރީގައި ތިބި ދެމީހުންނެވެ. އެއީ މަކުނުދޫގައި އެއާޕޯޓުއެޅުމަށް ބޭނުންވާ ބިން ހިއްކަން ހަވާލުކޮށްފައިވާ ކުންފުނީގެ ދެ މުވައްޒަފުން ކަމުގައިވެސް ފުލުހުންގެ އިދާރާއިން ބުންޏެވެ. އެނގިފައިވާ ގޮތުގައި މަރުވި ދެމީހުންނަކީވެސް އިންޑިއާއަށް ނިސްބަތްވާ ދެމީހުންނެވެ.

ގޮވުމުގެ ބާރުގަދަ ކަމުން މަރުވި މީހުންގެ ހަށިތައްވެސް ވަނީ ކުދިކުދިވެފައެވެ.

މިހާދިސާ އާއި ގުޅިގެން ބަލަންޖެހޭ ކަންކަން ބަލަމުންދާކަމުގައި ފުލުހުންގެ އިދާރާއިން ވަނީ ބުނެފައެވެ.