ހދ. މަކުނުދޫގައި ބާރުގަދަ އެއްޗެއް ގޮވައި، ބިދޭސީ ބަޔަކު މަރުވެއްޖެއެވެ.

މިހާދިސާ ހިނގާފައި ވަނީ، މިއަދު ހަވީރު މަކުނުދޫ މަސްމާރުކޭޓް ސަރަހައްދުގައެވެ. ހާދިސާގައި މަރުވީ ކިތައް މީހުންކަމެއް ސާފެއް ނުވެއެވެ. އެހެން ނަމަވެސް ފުލުހުން ވިދާޅުވީ ދެ މީހަކު މަރުވެފައިވާ ކަމުގެ މައުލޫމާތު ލިބިފައިވާ ކަމަށެވެ. އަދި ހާދިސާ ހިނގި ސަރަހައްދުގައި ފުލުހުން ހަރަކާތްތެރިވަމުން އަންނަ ކަމުގައިވެސް ފުލުހުންގެ އިދާރާއިން ބުނެފައިވެއެވެ.

މަރުވިކަމަށް ބެލެވިފައި ވަނި، ނަރުދަމާ އެޅުމުގެ މަސައްކަތް ކުރަމުން ދިޔަ ބިދޭސީންގެ ތެރޭގައި ހިމެނޭ ބައެކެވެ.

މަކުނުދޫއިން ވާހަކަދެއްކި މީހުން ބުނެފައި ވަނީ ގޮވިއެއްޗެއްގެ ބާރުގަދަ ކަމުން، މަރުވި މީހުންގެ ހަށިތައްވެސް ކުދިކުދިވެގެން ގޮސްފައިވާ ކަމަށެވެ. އަދި އެބާރުގަދަ ގޮވުމުގެ އަޑު ރަށުތެރެއަށް ވަރަށް ބާރަށް އިވުނު ކަމުގައިވެސް އެރަށުން ވާހަކަ ދެއްކި ބައެއް މީހުން ބުނެފައިވެއެވެ.

ހުކުރު ދުވަހު، ކުޅުދުއްފުށީ އެއާޕޯޓުގައިވެސް ވަނީ ގޭސް ސިލިންޑަރެއް ގޮވައި ބަޔަކަށް އަނިޔާވެފައެވެ. އެހާދިސާގައި ސީރިއަސް އަނިޔާތަކެއް ލިބުނު މީހާ މިހާރު ވަނީ އިތުރު ފަރުވާއަށް އިންޑިއާއަށް ގެންގޮސްފައެވެ. މަކުނުދޫ ނަރުދަމާ ސައިޓްގައިވެސް ގޮވީ ގޭސް ސިލިންޑަރެއްކަމުގައި އެރަށުން ވާހަކަދެއްކި ބައެއް މީހުން މީޑިއާތަކަށް މައުލޫމާތު ދީފައިވެއެވެ. އެހެން ނަމަވެސް މަކުނުދޫގައި ގޮވިއެއްޗަކާއި ގުޅޭ ގޮތުން ކަމާއި ބެހޭ ފަރާތްތަކުން މިހާތަނަށް އެއްވެސް މައުލޫމާތެއް ހާމައެއް ނުކުރެއެވެ.