ހައްދުންމަތީގެ ބައެއް ރަށްތަކުގައި އެމް.އެން.ޑީ.އެފް. އިން އަސްކަރީ ތަމްރީންތަކެއް ފަށައިފިއެވެ. އެ އިދާރާއިން ބުނީ މި ތަމްރީންތައް ކުރިއަށްދާނީ މިއަދުން ފެށިގެން މިމަހުގެ 30 ވަނަ ދުވަހާއި ހަމައަށްކަމަށެވެ.

ލ. އަތޮޅުގެ 12 ރަށެއްގައި މި ތަމްރީންތައް ކުރިއަށް ގެންދިއުމަށް ހަމަޖެހިފައިފައިވާއިރު، އެއީ ގާދޫ، ފޮނަދޫ، ކައްދޫ، މާންދޫ، ގަން، ގަސްފިނޮޅު، މަހާކަންފުށި، ބަރެސްދޫ، އުވަދެވިފުށި، ކަޅައިދޫ، ބޮކައިފުށި އަދި މުންޑޫއެވެ. އަދި ތަމްރީންތައް މިމަހުގެ 20 އިން 30 އަށް، ކޮންމެ ދުވަހެއްގެ އިރުއޮއްސި 6 އިން ހެނދުނު 6 އަކަށް ކުރިއަށްދާނެކަމަށް އެމް.އެން.ޑީ.އެފްއިން ވިދާޅުވެއެވެ.

އެމް.އެން.ޑީ.އެފްއިން އިތުރަށް ވިދާޅުވީ، މި ތަމްރީންތަކުގައި ވައިގެ ސަރަޙައްދުވެސް ބޭނުންކުރާނެއެވެ. އެގޮތުން ވައިގެ ސަރަޙައްދު ބޭނުންކުރާނެ އެންމެ ދުރުމިނަކީ 100 މީޓަރުކަމަށާއި، އެންމެ އުސްމިނަކީ 50 މީޓަރުކަމަށް އެމް.އެން.ޑީ.އެފްއިން ވިދާޅުވެއެވެ. އަދި ވައިގެ ސަރަޙައްދު ބޭނުންކުރާނެ އެންމެ ތިރި މިނަކީ ކަނޑުގެ ލޮނުގަނޑުން ފެށިގެންކަމަށްވެސް އެމް.އެން.ޑީ.އެފްއިން ވިދާޅުވެއެވެ.

ޤައުމީ ދިފާޢީ ބާރުގެ އަސްކަރީ އަދި އޮޕަރޭޝަނަލް ޤާބިލުކަން އިތުރުކުރުމަށް ދޭތެރެދޭތެރެއިން އަންނަނީ މިފަދަ ތަމްރީންތައް ހިންގަމުންނެވެ.