ޤައުމީ ބޭންކް، ބޭންކް އޮފް މޯލްޑިވުސްގެ އަހަރީ އާއްމު ޖަލްސާ، މިމަހުގެ 29 ވަނަ ދުވަހުގެ ރޭ ބޭއްވުމަށް ނިންމައި ބޭންކުން އެކަން އިއުލާނުކޮށްފިއެވެ.

ބީއެމްއެލް އިން ކޮށްފައިވާ އިޢުލާނުގައި ބުނެފައި ވަނީ މި ޖަލްސާ އޮންނާނީ އެރޭ އިސްލާމީ މަރުކަޒުގެ ހޯލުގައި ކަމަށެވެ. އަދި އަހަރީ އާއްމު ޖަލްސާގައި ބައިވެރިވެވޭނީ މިހިނގާ މެއިމަހުގެ 21 ގެކުރިން، ޙިއްޞާދާރުންގެ ގޮތުގައި ރަޖިސްޓްރީވެފައިވާ ފަރާތްތަކަށް ކަމުގައިވެސް ބީއެމްއެލްއިން ވަނީ ބުނެފައެވެ.

އަހަރީ އާއްމު ޖަލްސާއަށް އެޖެންޑާކޮށްފައިވާ މުހިންމު ކަންކަމުގެ ތެެރޭގައި، މިއަހަރުގެ ޖެނުއަރީ މަހު ބޭއްވުނު ޚާއްޞަ ގޮތުން ބޭއްވި އާއްމު ޖަލްސާގެ ޔައުމިއްޔާ ފާސްކުރުމާއި، ނިމިދިޔަ އަހަރުގެ ޑިރެކްޓަރުންގެ ރިޕޯޓާއި އޮޑިޓަރުންގެ ރިޕޯޓު ފާސްކުރުމާއި ނިމިދިޔަ އަހަރުގެ ބެލެންސް ޝީޓާއި އާމްދަނީގެ ބަޔާން ފާސްކުރުން ހިމެނެއެވެ. މީގެ އިތުރުން، ޑިރެކްޓަރުންގެ ބޯޑުން ހިއްސާދާރުންނަށް ބެހުމަށް ހުށަހަޅާ ފައިދާ ފާސްކުރުންވެސް މިޖަލްސާގައި އޮންނާނެއެވެ.

Advertisement

މިއަހަރަށް ކުންފުނީގެ އޮޑިޓަރުން ހޮވުމާއި، އެފަރާތްތަކަށް އުޖޫރަ ކަނޑައެޅުމުގެ އިތުރުން، ޑިރެކްޓަރުންގެ ބޯޑަށް މެމްބަރުން އިންތިޚާބުކުރުންވެސް މިޖަލްސާގައި އޮންނާނެ ކަމުގައި ބީއެމްއެލްއިން ވަނީ ބުނެފައެވެ.

މިދިޔައަހަރު ބީއެމްއެލްއަސް ފައިދާގެ ގޮތުގައި، 1.8 ބިލިއަން ރުފިޔާ ލިބިފައިވެއެވެ.