އިޒްރޭލާއި ދެކޮޅު ހަރަކާތްތައް ރާއްޖޭގައި ވަރުގަދަ ވަމުން އަންނަކަމަށް ބުނެ، އެޤައުމުގެ ރައްޔިތުން ރާއްޖެއަށް ދަތުރު ނުކުރުމަށް އަންގައި އިޒްރޭލްގެ ފޮރިން މިނިސްޓްރީން ބަޔާނެއް ނެރެފިއެވެ.

އެބަޔާނުގައި ބުނެފައި ވަނީ، ދިވެހިރާއްޖޭގައި އިޒްރޭލާއި ދެކޮޅު ހަރަކާތްތައް އިތުރުވެ ވަރުގަދަވަމުން އަންނަ ކަމަށާއި އެހެންކަމުން އިޒްރޭލުގެ ޕާސްޕޯޓުގައި ދިވެހިރާއްޖެއަށް ދަތުރު ކުރުމުގައި ސަމާލުވުމަށް އެދޭ ކަމަށެވެ.

އިޒްރާއީލުގެ އަސްކަރިއްޔާއިން ކެނޑިނޭޅި ޣައްޒާއަަށް ވައިގެ މަގުން ދެމުންދާ ހަމަލާތަކާއި ގުޅިގެންނާއި، ހުޅަނގު އައްސޭރީގައި އިޒްރޭލު ސިފައިން ހިންގަމުންދާ ލާއިންސާނީ އަމަލުތަކާއި ގުޅިގެން އެކަމާއި ދެކޮޅު ހެދުމުގެ ގޮތުން ރާއްޖޭގައިވެސް ދަނީ ހަރަކާތްތައް ހިންގަމުންނެވެ. އަދި ރާއްޖެއިން ގެންދަނީ، ޣައްޒާގައި ތިބި ރައްޔިތުންނަށް، ކާބޯތަކެއްޗާއި ފައިސާގެ އެހީތައް ފޮނުވަމުންނެވެ. މީގެ އިތުރުން ރާއްޖެއިން ތިބީ ފަލަސްޠީނުގެ ރައްޔިތުންނާއި އެކުގައިކަން ހާމަކުރުމުގެ ގޮތުން ރާއްޖޭގެ އެކި ކަންކޮޅުތަކުގައި ދަނީ އެއްވުންތަކާއި، ހިނގާލުންތައް ބާއްވަމުންނެވެ. މިގޮތުން ފަލަސްޠީނުގެ ރައްޔިތުންނަށް ތާއީދުކޮށް ރާއްޖޭގައި ބާއްވާ އެންމެ ބޮޑު ހިނގާލުން މިއަދު ހަވީރު މާލޭގައި އޮންނާނެއެވެ.

އިޒްރޭލުގެ ހައްދު ފަހަނަ އެޅި ޢަމަލުތަކާއި ގުޅިގެން ދިވެހިރައްޔިތުންދަނީ، ރާއްޖެއިން އިޒްރޭލަކީ، ދައުލަތެއްގެ ގޮތުގައި ބަލައި ނުގަތުމަށާއި، އަދި އިޒްރޭލުގެ ޕާސްޕޯޓް ޤަބޫލު ނުކުރުމަށާއި، އިޒްރޭލްގެ ރައްޔިތުންނަށް ރާއްޖޭގެ ބޯޑަރުތައް ބަންދުކުރުމަށް ގޮވާލަމުންނެވެ. އަދި ރާއްޖެއަށް އިޒްރޭލު މީހުން ވަނުން މަނާކުރުމަށް ރައްޔިތުންގެ މަޖިލީހަށް ވަނީ ޤަރާރެއްވެސް ހުށައަޅާފައެވެ.

އިޒްރޭލުން ޣައްޒާއަށް ދެމުންދާ ވައިގެ ޙަމަލާތަކުގައި މިހާތަނަށް 4000 މީހުން ޝަހީދުވެފައި ވާއިރު އޭގެތެރެއިން ދެބައިކުޅައެއްބަޔަކީ، ކުޑަކުދިންނެވެ.