އައިލެންޑް އޭވިއޭޝަން ސާވިސަސްއިން މާފަރު އިންޓަނޭޝަނަލް އެއާޕޯޓުގައި ޒަމާނީ ފެންވަރުގެ ފިއުލް ފާމެއް ހުޅުވައިފިއެވެ. މިއީ އެކުންފުނިން ގާއިމުކުރި ފުރަތަމަ ފިއުލް ފާމެވެ.

މާފަރު އެއާޕޯޓުގައި ބޭއްވި ރަސްމިއްޔާތެެއްގައި މި ފިއުލް ފާމް ހުޅުވައިދެއްވީ އައިލެންޑް އޭވިއޭޝަންގެ މެނޭޖިން ޑިރެކްޓަރު މުހައްމަދު މިހާދު އާއި މޯލްޑިވްސް އިސްލާމިކް ބޭންކުގެ މެނޭޖިން ޑިރެކްޓަރު އަދި ސީއީއޯ މުފައްދަލް އިދްރީސް ހުމްރީއެެވެ.

އެއްފަހަރާ ހަތަރު ލައްކަ ލީޓަރުގެ ތެޔޮ ރައްކާކުރެވޭ މި ފިއުލް ފާމަކީ މޯލްޑިވްސް އިސްލާމިކް ބޭންކުން ފައިނޭންސްކޮށްގެން ގާއިމުކޮށްފައިވާ ފާމެކެވެ.

އައިލެންޑް އޭވިއޭޝަނުން ބުނީ މި ފިއުލް ފާމުގެ ސަބަބުން މާފަރު އެއާޕޯޓުގެ އޮޕަރޭޝަންތަކުގެ ގާބިލުކަން ވަރަށް ބޮޑަށް އިތުރުވެގެންދާނެކަމަށެވެ.

މި ފިއުލް ފާމާ އެކު، ދުވާލެއްގެ މައްޗަށް އެވްރެޖްކޮށް ޑޮމެސްޓިކް 4-5 ފްލައިޓަށް އަދި އިންޓަނޭޝަނަލް 3-5 ފްލައިޓަށް ހިދުމަތް ފޯރުކޮށްދެވޭނެއެވެ. 

މި ފިއުލް ފާމުގައި 400،000 ލީޓަރުގެ ފިއުލް ރައްކާ ކުރެވޭ އަދި 35،000 ލީޓަރުގެ ތެޔޮ ބައުޒަރަކާއި 20،000 ލީޓަރުގެ ތެޔޮ ބައުޒަރެއް ހިމެނެއެވެ. 

މާފަރު އިންޓަނޭޝަނަލް އެއާޕޯޓަކީ ރާއްޖެއަށް އެންމެ ގިނަ އަދަދަކަށް ޖެޓް ޖައްސާ އެއް އެއާޕޯޓެވެ. އަހަރެއްގެ މައްޗަށް އެވްރެޖްކޮށް 700 އެއާ ޓްރެފިކް މޫވްމަންޓްސް ރެކޯޑުކުރެވޭ މި އެއާޕޯޓަކީ ވެލާނާ އިންޓަނޭޝަނަލް އެއާޕޯޓަށް ފަހު ރާއްޖޭގައި ހެދި އެންމެ ބޮޑު އެއާޕޯޓެވެ.