Advertisement
ކުރީގެ ރައީސް މުޙައްމަދު ނަޝީދު --
މުޅި ރާއްޖޭގެ ހުރިހާ ރައްޔިތުން އިސްލާމްވީ އެއްދުވަހަކު ނޫން: ރައީސް ނަޝީދު
މުޅިރާއްޖޭގެ ހުރިހާ ރައްޔިތުން އިސްލާމްވީ އެއްދުވަހަކު ނޫންކަމަށް ވިދާޅުވެ، މިއަދު ފާހަގަކުރާ ރާއްޖެ އިސްލާމްވި ދުވަހުގެ މައްޗަށް ނުބައި ތަޞައްވުރެއް އުފެދޭ މޭރުމަކުން ރައީސް ނަޝީދު ވާހަކަފުޅު ދައްކަވައިފިއެވެ.
ރައީސް ނަޝީދު ކުރެއްވި ޓްވީޓެއްގައި، ވިދާޅުވީ، މުޅިރާއްޖޭގެ ހުރިހާ ރައްޔިތުން އިސްލާމްދީން ބަލައިގަތީ އެއްދުވަހަކާއި ނޫންކަމަށާއި، މިއަދު ފާހަގަ މިކުރާ ދުވަހަކީ، އޭރުގެ ރަސްގެފާނު އިސްލާމްވީ ދުވަސްކަމަށެވެ. އަދި ހުރިހާ ބޭފުޅުންނަށް ދުވަހުގެ ތަޙްނިޔާ ފޮނުއްވާކަމުގައިވެސް ރައީސް ނަޝީދު ވިދާޅުވިއެވެ.
ދިވެހިރާއްޖެ އިސްލާމްވި ދުވަހުގެ ގޮތުގައި ފާހަގަކުރަމުން އަންނަނީ ކޮންމެ ހިޖުރީ އަހަރެއްގެވެސް، ރަބީޢުލްއާޚިރު މަހުގެ ދެވަނަ ދުވަހެވެ. އެދުވަހަކީ ދިވެހިދައުލަތުން އިސްލާމްދީން ބަލައިގަތް ދުވަހެވެ. އަދި އޭރު ހުންނެވި ރަސްގެފާނު އިސްލާމްވެވަޑައިގެންނެވުމަށްފަހު އަތޮޅުތެރޭގެ ރަށްރަށުގެ ރައްޔިތުން އިސްލާމްދީނަށް އެނބުރުމަށްޓަކައި ރަށްރަށަށް ވަފުދުތައް ފޮނުއްވެވިއެވެ.
ދިވެހިރާއްޖެ އިސްލާމީ ޙިދާޔަތު ލިބުމަށްފަހުގައި، ދިވެހި ދައުލަތަކީ އިސްލާމީ ދައުލަތެއްގެ ގޮތުގައި އޮންނަތާ ހިޖުރީ ގޮތުން 897އަހަރު އަދި މީލާދީ ގޮތުން 870 އަހަރު މިވަނީ ފުރިހަމަވެފައެވެ.
ރާއްޖެ އިސްލާމްވީ ދުވަހާއި ގުޅުވައިގެން ރައީސް ނަޝީދު މިމޭރުމުން ވާހަކަފުޅު ދެއްކެވި އިރު، ދިވެހިންގެ ދީނީ ޢަޤީދާއާއި ގުޅޭ ގޮތުން ރައީސް ނަޝީދު ދައްކަވާ ވާހަކަފުޅުތަކަށް ގިނަ ބައެއްގެ ނުރުހުން އަމާޒުވެފައިވެއެވެ.
